C朗喺21分鐘入波，完美致敬祖達。

周日(7日)凌晨世盃外歐洲區F組賽事，葡萄牙作客5比0大炒阿美尼亞，40歲嘅C朗拿度繼續用入球證明自己，佢今場個人梅開二度，包括一記30碼精彩世界波。C朗喺世盃外累積入球超越美斯，距離終極紀錄只差1球，創造歷史只係時間問題。

葡萄牙今場靠「沙特幫」孭飛，5個入波全部嚟自沙特效力嘅球員，C朗嘅艾納斯隊友祖奧菲歷斯10分鐘先開紀錄，21分鐘C朗接應傳中近門射入，效力希拉爾嘅祖奧簡斯路32分鐘亦有進帳。換邊後1分鐘，C朗離門30碼轟入世界波後，祖奧菲歷斯亦喺62分鐘埋齋，葡萄牙贏5比0旗開得勝。

C朗世界波：https://x.com/i/status/1964376222600995179

C朗保持嘅國際賽入球紀錄增加到140球，其中世盃外圍賽累積38球，超越美斯嘅36球，距離終極紀錄只差1球，由危地馬拉名將卡路士雷斯保持(39球)。以C朗近期嘅狀態，葡萄牙周三(10日)凌晨作客匈牙利，歷史就有機會被改寫。

今場係迪亞高祖達車禍離世後，葡萄牙國家隊首場賽事，祖達好友魯賓尼維斯特意改着21號波衫，而C朗首個入波就喺21分鐘攻入，令悼念更有意義。領隊馬天尼斯賽後表示：「祖達一直同我哋一齊，喺21分鐘更加特別，呢個係一個訊號，祖達嘅精神引領球隊嘅旅程。」